Etxebizitzako edo lokaleko Partaidetza Kuotak jabe bakoitzak elementu komunekiko duen portzentajezko partaidetza definitzen du eta ondorengo edozein prozeduraren bitartez ezarri daiteke:
Sustatzaile-saltzailearen bitartez, pisu eta lokalen salmentarekin hasi baino lehenago.
Eraikinaren jabe guztien adostasunaren bitartez.
Laudo arbitrala edo ebazpen judizialaren bitartez, aurreko bi prozeduraren bitartez ez bada ezartzen.
Era berean, pisu edo lokalaren kuota, ondokoen arabera ezarriko da:
Eraikin osoarekiko duen azalera erabilgarria.
Barnealdean edo kanpoaldean kokatua badago.
Bere kokapena eraikinaren barnean.
Pisuak edo lokalak eraikinaren elementu komunen egingo duen erabilera.
Dena dela, kuota partaidetza ezartzeko prozedura edozein izanda ere, era objektiboan ezarri behar da, ez arbitrarioan.
Honi dagokionez, kontuan izan behar da partaidetza kuota ezin dela aldatu, eraikinaren jabe guztiak hala jokatzeko ados ez badaude.
Erabilerak
Azalduaz gain, partaidetza kuotak ondorengorako balio du:
Jabe komunitateak sortzen dituen gastuak jabeen artean sakabanatzeko.
Komunitatearen egoeratik sortzen den edozein onurarekiko eraikinaren jabeek duten partaidetza ezartzeko.
Boskak Batzordera joateko eskubidea dutenen artean sakabanatzeko; Batzordea osatzeko behar diren quorum-ak ezartzeko; erabakiak hartzeko, erabaki bakoitzeko behar diren gehiengoen arabera.
Eraikinen jabeen artean egin behar den gastuen sakabanaketari dagokionez, esan beharra dago sakabanatze hori orokorrean bakoitzaren kuotaren proportzioanegiten dela.
GASTU ARRUNTAK:
Instalazio eta zerbitzu komunen (igogailua, antenak, berokuntza, teilatua, eskailera, etab.) mantentze, kontserbazio eta ohiko konponketatik ondorioztatzen diren gastuak dira. Zerbitzu komun horien artean gaineratuko da kontrata daitezkeen langileen zerbitzua (garbiketa, atezainak, lorezainak, etab.). Era berean, gastu arruntzat hartuko dira erkidegoak honako hauengatik ordaintzen dituen tasak: aseguru-polizak, mantentze-kontratuak, etab
APARTEKO GASTUAK:
Honako hauek dira: erkidegoko zerbitzu berri bat gaineratzeak edo legezko araudi bati egokitzeak eragindako gastuak, eta dauden instalazioak edo zerbitzuak (teilatua, fatxadak, hoditeria, berokuntza, igogailua, etab.) hondatzetik ondorioztatutako gastuak. Horiek direla-eta erkidegoak ahalegin ekonomikoa egin behar du, eta gastuaren zenbatekoaren arabera, "derrama" edo kuota gehigarri bakar batekin edo jabe bakoitzak ordaindu behar duen kuota arrunta denboraldi jakin batean handituz ordainduko da.
Premiazko baldintza bakarra izango da jabetzako partaidetza-kuotarekiko irizpide desberdinarekin ezarritako gastu-kuotek erkidegoko Estatutuetan finkatuak izan behar dutela, bai hasieran bai geroago, jabe guztien ahobatezko erabakiaren bitartez.
Gastuaren banaketari dagokionez hasierako irizpidean egin daitekeen edozein aldaketarako, jabeek ahobatez erabaki beharko dute, eta Akta Liburuan adierazi beharko da idatziz.
Aurreko prozeduren bitartez etxebizitza edo lokal bakoitzaren gastuen partaidetza-kuota zehaztea ahalik eta modu objektiboenean egiten saiatu behar da, eta, beraz, hainbat faktore hartu behar dira kontuan, honako hauek esaterako:
Azalera erabilgarria
Barruan edo kanpoan dagoen
Eraikinaren barruan duen kokapena, orientazioa, altuera, etab
Eraikinaren zerbitzu eta elementu komunentzat aurreikusitako erabilera.
Etxebizitzaren edo lokalaren jabea da beti erkidegoan kuotak ordaindu behar dituena, ordaindu ondoren errentariari edo gozamen-eskubidedunari kobratzeko aukera alde batera utzita; betiere euren artean hori erabaki badute.
ERRESERBA FONDOA
Ohiko eta ezohiko kuotez gain, Jabeen Erkidegoak Erreserba Fondo bat eratu behar du, jabeek eman beharko duten diru kopuru jakin batekin osatua, eta horren helburua izango da eraikina kontserbatzeko eta konpontzeko obrek eragindako gastuei aurre egiteko baliabideak, eta kalte edo erantzukizun zibileko aseguru bat edo eraikinaren eta horren instalazioen mantentze-zerbitzu iraunkorra kontratatzeko baliabideak beti eskuragarri izatea.
Erreserba Fondoa beti Erkidegoko kontuetan gorde beharko da, eta Jabeen Batzordeak zehazten duen zenbatekoa izan beharko du, betiere Erkidegoaren azken aurrekontu arruntaren % 5 baino txikiagoa izan gabe. Kontzeptu horri jarraiki ematen diren diru kopuruak behin betikoak eta itzulezinak izango dira, eta, beraz, ezin izango da horiek itzultzea eskatu.
ORDAINDU GABEKO KUOTEN ERREKLAMAZIOA:
Erkidegoen bizikidetza maiz hondatzea eragiten duten arazoetako bat dagokien gastu-kuota erregulartasunez ordaintzen ez duten Jabeak egotea da; izan ere, jabe horiek berankor bihurtzen dira.
Egoera horren aurrean zer egin daiteke?
Logikoa denez, gehien gomendatzen den lehen gauza etxepeko horrekin lehenbailehen hitz egitea da, zorra gehiegi hazi ez dadin, eta hori ez ordaintzeko arrazoiak aztertu ondoren, konponbide bat bilatzen saiatzea, etxepekoarekin erabaki bat hartuz; erabaki hori metatutako zorra zentzuzko denboraldi batean zatitzea izan daiteke, betiere jabeak hori beteko duela eta erkidegoari dirua itzuliko zaiola bermatuz.
Etxepekoak ados jartzen badira, Bizilagun Bitartekotza eta Adiskidetze zerbitzuan ematen ditugun zerbitzuetako bat balia daiteke; izan ere, zerbitzuaren eginkizunen artean dago, zehazki, Jabeen Erkidego bateko etxepekoen artean bitartekari-lanak egitea, betiere horiek ados jartzen ez badira.
Hala ere, etxepekoak bere zorrari erantzuten ez diolako edo hartutako konpromisoak betetzen ez dituelako, zorra ordaindu gabe jarraitzen badu, Legeak formula azkar eta eraginkorrak aurreikusi ditu etxepeko berankorrak bere zorra ordaintzea lortzeko.
Prozesu monitorioa:
Formula horien artetik gehien erabiltzen dena "prozesu monitorioa " da, gehienez 30.000 euroko zorrak erreklamatzeko aurreikusia, eta, legegileak esanbidez aurreikusi duenez, Jabeen Erkidegoak etxepeko berankorrei erreklamatzeko kasuetan aplikatzekoa.
Prozesu hau gauzatzeko jarraitu beharreko prozedura nahiko sinplea da:
1. Jabeen Batzordeak honako hauek egin beharko ditu:
Erreklamatu beharreko zenbatekoa onartzea, eta gehiengo bidez erabakitzea prozesu judizial baten bitartez egitea.
Presidenteari edo administratzaileari eskumena ematea erreklamazio hori Epaitegian aurkezteko.
Batzordeak hartutako Erabakia jakinaraztea zordunari eta gainerako jabeei.
Era berean, prozedura judizialarekin jarraitzeko, abokatu baten edo prokuradore baten laguntza izatea derrigorrezkoa ez den arren, profesional horien zerbitzuak kontratatzea erabakitzen bada, Batzordeak esanbidez hori egiteko eskumena eman beharko dio presidenteari edo administratzaileari. .
Zorra oso zaharra baldin bada, erreklamazioa dagokion etxebizitzarekin edo lokalarekin lotzea komeni da, jabea zein den kontuan hartu gabe; horrela, etxebizitza saldu den arren eta egungo jabeak soilik urte horretako eta aurreko urteko zorrari erantzun behar dion arren, aurreko jabeek ere erantzun beharko dute..
2. Presidenteak edo administratzaileak Epaitegian aurkeztuko dute erreklamazioa, honako hauek eginez:
Erreklamazioa egiteko ahalmena ematen dion Jabeen Batzordeko erabakiaren ziurtagiria aurkeztea (ziurtagiria idazkariak sinatu beharko du, edo kargu hori ez badago, presidenteak), eta baita zorraren zenbatekoa zordunari behar bezala jakinarazi zaiola ziurtatzen duen Dokumentu bat ere.
Egon daitezkeen aurretiazko gastuak erreklamatzea, zordunari zorra erreklamatzeko; horretarako, gastu horien fakturak edo frogagiriak aurkeztu beharko dira.
Sor daitezkeen interesak erreklamatzea, eta baita Epaiketaren kostuak ere.
Abokatuak edo prokuradoreak emandako zerbitzu juridikoen gastuak erreklamatzea, betiere profesional horiek kontratatu badira.
Era berean, erreklamazioa aurkezterakoan, erreklamatutako zenbatekoari, interesei eta epaiketaren kostuei aurre egiteko etxepeko zordunaren behar adina ondasunen aurreneurrizko enbargoa eskatu ahalko zaio Epaileari.
Arestian adierazi denez, zorra zaharra baldin bada, ondasunaren egungo titularrari eta aurrekoari eskatu ahalko zaie, eta Epaileak erabakiko du zorra nori dagokion.
3.- Erreklamazioa aurkeztu ondoren, eta hori izapidetzea onartu bada:
20 eguneko epean, Epaileak dagokion demandatuari eskatuko dio Erkidegoari zorra ordaintzeko eta ordainketa Auzitegian egiaztatzeko, edo, erreklamatutako zenbatekoa ordaintzea ez dagokiola erabakitzen badu, Epailearen aurrean agertzeko eta ordainketa ez egiteko arrazoiak idazki bidez alegatzeko eskatuko dio.
Demandatuak ez baldin badio erantzuten erreklamazio judizialari, eta ordaintzen ez badu eta alegazioak egiteko agertzen ez bada, Epaileak zuzenean epaia emango du, eta pertsona berankorrak ordaindu egin behar duen ala ez erabakiko du, eta baita gastuen, interesen eta bestelakoen ardura bere gain hartu behar duen ere; horren ondorioetarako, demandatuaren ondasunak enbargatzea agindu dezake, eta zor gisa aitortutako zenbatekoa osatu arte horiek enkantean saldu ahalko ditu.
